Tosyalı Hasan Ağa'nın Şumnu Taburuna Binbaşı olarak tayini (Hatt-ı Hümayun)

 KONU : Şumnu Muhafızı Süleyman Paşa tarafından oluşturulan Şumnu’da bulunan Onuncu Alay Dördüncü Taburu’na Dersaadet Sağkol Ağası Tosyalı Hasan Ağa’nın binbaşı olarak tayinine dair Sultan II. Mahmut’un Hatt-ı Hümayunu.

 

BELGE METNİ :

Manzûrum olmuşdur

Serasker Paşa’nın işbu arzı mûcibince tabur-ı mezkûra mûmâ ileyh Hasan Ağa binbaşı nasb ve tayin ve iktizâ iden emri ısdâr olunmak üzere icrasına mübâderet oluna.

 

Serasker Paşa kullarının arzıdır.

İnhası veçhile mûma ileyh Hasan Ağa kullarının tabur-ı mezkûra binbaşı nasb ve tayini muvâfık-ı irâde-i seniyye-i şehriyârîleri buyrulur ise iktiza iden memuriyet emr-i şerîfi ısdâr olunacağı muhât-ı ilm-i âlem-i ârâ-yı şehinşâhîleri buyruldukda emir ve ferman hazret-i men lehu’l-emr efendimizindir.

 

Ma‘rûz-ı bendeleridir ki;

Şumnu Muhafızı atûfetlü Süleyman Paşa hazretleri marifetiyle tanzim olunup el-hâletü hâzihî Şumnu’da olan Onuncu Alay Dördündcü Tabur olarak idhal olunan tabura birinin Binbaşı nasb ve tayini lazım gelüp el-hâletü hâzihî Dersaadet’de olan Altıncı Alayın Birinci Taburunda Sağkol Ağası olan Tosyalı Hasan Ağa kulları talim ve taallüm ve idare-i umûr-ı askeriyeye isti‘dâd ve liyâkati olduğundan tabur-ı mezkûra binbaşı nasb ve tayini muvafık-ı irâde-i seniyyeleri buyrulur ise iktiza iden memuriyet emr-i şerifinin ısdârı bâbımda emir ve ferman hazret-i men lehu’l-emrindir.

29 Zilhicce 1243 (12 Temmuz 1828)

Bende

Mehmed Hüsrev

Serasker-i Asakir-i Mansure