Tosya’da Sürgünde Ölen Bir Boyar

Tosya’da Sürgünde Ölen Bir Boyar

KONU:

Eflak Voyvodası iskerlet takımından Tosya’ya sürgüne gönderilen ve Tosya'da eceliyle ölen Ligor Sako terekesinin hazinece zabt edilmeyerek kimsesiz kalan ailesine terki.

METİN:

Tosya Nâibinin iʻlâmıdır.

Maʻrûz-ı dâʻî-i devâm-ı kemter-i devletleridir ki;

An asl Âsitâne-i aliyye civârında Tarabya nâm sâkinlerinden iken bundan akdem bâ fermân-ı âlîşân Tosya’ya menfâ olan Rum Milletinden Likor Sako nâm Boyar ehl ü ıyâliyle ve taʻyîn buyrulan mübâşiri maʻrifetiyle medîne-i mezkûr]e]ye lede’l-vurûd ve birkaç mâh sâkin olup ve bi emri’llâhi teʻâlâ mürd olmağla hâlik-i mesfûrun emvâl ve eşyâsı tahrîr ve nukûdundan suâl olundukda bizleri olduğumuz mahalden acele ihrâc itdiler ve bir mikdâr eşyâ furûht idüp mübâşirimize hizmet virdik ve hâlâ Tosya sâkinlerinden Aci Yanni bezirgândan üç yüz guruş istidâne eyledik deyü zevcesinin takrîri ve hâlik-i mesfûrun emvâl ve eşyâ defterin huzur-ı destûr-ı müşîrânelerine arz ve iʻlâm olundu bâkî emr ü fermân hazret-i men lehu’l-emrindir.

Tahrîran fî’l-yevmi’s-sâdis bin şehr-i Muharremi’l-harâm li sene sebʻa ve selâsîn ve mieteyn ve elf (6 Muharrem 1237/3 Ekim 1821)

Ed-dâʻî li devâm-ı ömr-i devleti’l-âlî

Mustafa Şakir el-vekîlu an Mehmed Adil el-müvellâ li-hilâfetihî bi medine-i Tosya

Ankara ve Kengırı sancakları mutasarrıfı Rüşdü Paşa kullarının kapu kethudâsına vârid olan şukkasıdır

İnhâ eylediği hâlik-i mersûmun terekesi bî meâl ve zabta nâ şâyân olduğuna nazaran veresesine terki ve yâhûd yine Tosya’da ikâmetleri hususlarında ne vechile irâde-i seniyye-i mülûkâneleri müteallık olur ise emr ü fermân hazret-i veliyyü’l-emrindir.

İnâyetlü mürüvvetlü atûfetlü oğlum efendim

Eflak Voyvodası iskerlet takımından Tosya’da menfiyen mukîm Likor Sako nâm zımmî bu esnâda kendü eceliyle mürd olmuş ve emvâl ve eşyâsı maʻrifet-i şerʻle zabt ve tahrîr ve bahâ takdîr olunarak iki bin iki yüz guruşluk emvâli zuhûr itmekle ol bâbda vârid olan iʻlâm ve mahzar-ı defteri işbu rakîme-i hulûsûrîye matvıyyen irsâl ve takdîm kılınmış olmağla hâlik-i mersûmun iki kızıyla bir ihtiyâre karısından gayri kimsesi olmayup onlar da bîkes ve garîbe ve merhamet-i aliyyeye şâyeste olmağla ne vechile irâde buyrulur ise ol bâbda emr ü fermân devlet-i aliyyenindir efendim.

Fî 9 M sene 37/6 Ekim 1821

İzzetlü Defterdâr Efendi

İşbu evrâk Rikâb-ı Hümâyûn-ı Mülûkâneye lede’l-arz hâlik-i mersûmun terekesi vârislerine terk oluna vârislerin bu tarafa gelmeleri iktizâ itmez deyü hatt-ı şerîf-ı şâhâne şeref-rîz-i sudûr olmağla iktizâsını tanzim eyleyesiz deyü buyruldu

Fî 29 M sene 37/29 Ekim 1821

Mûcebince emri tahrîr oluna

Hâlâ Ankara ve Kengırı sancakları mutasarrıfı vezîrim Rüşdü Paşa iclâlehûya ve Tosya Kâdîsına hüküm ki;

Sen ki vezîr-i müşârun ileyhsin Eflak Voyvodası iskerlet takımından Tosya’da menfiyen mukîm olan Likor Sako nâm zımmî bu esnâda kendü eceliyle mürd olmuş ve emvâl ve eşyâsı maʻrifet-i şerʻle zabt ve tahrîr ve bahâ takdîr olunarak iki bin iki yüz guruşluk emvâli zuhûr itmiş ve bu bâbda vurûd iden iʻlâm ve mahzar-ı defter takdîm kılınmış olup ancak hâlik-i mersûmun iki kızıyla bir ihtiyâre karısından gayri kimsesi olmayup onlar da bîkes ve merhamet-i seniyyeme şâyân olduklarını beyân birle ne vechile irâde-i aliyyem taalluk ider ise menût-ı re’y-i âcizânem idüğünü bu defa kapu kethüdâsı tarafına mebʻûs bir kıta şukkanızda tahrîr ve inhâ ve zikr olunan iʻlâm ve defteri baʻs ve isrâ eylediğin ecilden hâlik-i mersûmun terekesi bî-hâl olup zabta şâyân olduğuna nazaran veresesine terki ve yanında bulunan ihtiyâre karısıyla kızları acîze makulesinden olduklarına binâen Dersaâdetime avdet ve yâhûd yine Tosya’da ikâmetleri husûsları Rikâb-ı Hümâyun-ı Mülûkânemden lede’l-istîzân hâlik-i mersûmun terekesi vârislerine terk oluna vârislerin bu tarafa gelmeleri iktizâ itmez deyü hatt-ı şerîf-i şâhânem şeref-rîz-i sudur olmağla mûcebince amel ü harekete bezl-i cell-i himmet eylemek fermân hassaten işbu emr-i âcizî ısdâr ve      ile irsâl olunmuşdur imdi vusulünde ber vech-i muharrer keyfiyet maʻlûmun oldukda şeref-rîz-i sudûr olan hatt-ı hümâyûn-ı şevket-makrûnum mûcebince amel ü hareket birle hâlik-i mersûmun terekesini vârislerine terki husûsuna min külli miknet eyleyesin ve sen ki kâdî-i mûmâ ileyhsin hilâfından sarf-ı nazarla emr-i şerifime iʻtimâd ve murâkabet eylemen bâbında fermân-ı âlîşânım sâdır olmuşdur.

Muhâsebe-i [Evve]l

Fî 3 S sene 37/30 Ekim 1821

Yazılmışdır.

An asl Âsitâne-i aliyye cânibinde Tarabya sâkinlerinden iken bundan akdem bâ emr-i âlî medîne-i Tosya’ya menfiyen gelen Likor Sako nâm Boyar mürd olup verâseti zevcesi Sakastice nâm zimmiye ile sulbiye sagîre kızları Mariyorya ve Loksandirya ve hâlâ Tarabya’da sâkine anası diğer Loksandirya nâm zimmîlere münhasıra olmağla hâlik-i mesfûrun medîne-i mezkûrda mevcûd metrûkâtı maʻrifet-i şerʻ-i şerîf ve vârisleri maʻrifetleriyle tahrîr olunan defteridir ki ber vech-i âtî ale’l-esâmî zikr ü beyân olunur.

Tahrîran fî’l-yevmi’s-sâdis min şehr-i Muharremi’l-harâm li sene sebʻa ve selâsîn ve mieteyn ve elf (6 Muharrem 1237/3 Ekim 1821)

Müstaʻmel Kakum Cebe Kürk Aded 1 Guruş 50	Müstaʻmel Çalkuh Cebe Kürk Aded 1 Guruş 40	Müstaʻmel Zerduh Cebe Kürk Aded 3 Guruş 200	Müstaʻmel Sammur Cebe Kürk Aded 1 Guruş 1
Müstaʻmel İçi Sandallı Çuha Cebe Aded 1 Guruş 100	Müstaʻmel Lahori Şal Aded 1 Guruş 300	Müstaʻmel Hâlî Şal Aded 1 Guruş 100	Müstaʻmel İngiliz Şal Aded 1 Guruş 30
Müstaʻmel Çuha Binîş Aded 1 Guruş 100	Müstaʻmel Çuha Çağşûr Aded 1 Guruş 40	Müstaʻmel İslambol Şâlîsi Entari Aded 1 Guruş 40	Müstaʻmel Kemeri Beyaz Entari Aded 61 Guruş 30
Müstaʻmel Basma Entari Aded 1 Guruş 25	Müstaʻmel Abânî Aded 1 Guruş 10	Müstaʻmel Çarşaf Aded 1 Guruş 10	Müstaʻmel Kesaye ve Birincik Gömlek Aded 6 Guruş 95
Müstaʻmel Kesaye ve Birincik Don Aded 5 Guruş 45	Müstaʻmel Beyaz Yelek Aded 4 Guruş 80	Müstaʻmel Kılıf Aded 2 Guruş 80	Müstaʻmel Gecelik Aded 1 Guruş 10
Müstaʻmel Çilte Aded 3 Guruş 75	Müstaʻmel Çekmece Aded 1 Guruş 30	Müstaʻmel Zoğum(?) Fasıklarınca üç aded kitab Guruş 100	Müstaʻmel Yorgan Aded 1 Guruş 30
Müstaʻmel Kumaş Yasdık Aded 1 Guruş 10	Müstaʻmel Meşinden Minder ve Yasdık Aded 1 Guruş 10	Müstaʻmel Seccade Aded 1 Guruş 30	Müstaʻmel Cizme Çift 2 Guruş 10
Müstaʻmel Hokkası Gümüş Kubur Dividi maa takım Guruş 40	Müstaʻmel Şemsiye Aded 1 Guruş 25	Müstaʻmel Kehribar Takımlı Çubuk Aded 2 Guruş 50	Evânî-i Nuhâs Guruş 65
Leğer ve İbrik Aded 1             1 Guruş 20	Fincan   Zerk       İbrik 4             4             2 Guruş 15

Yekûn

Yalnız iki bin iki yüz on guruşdur

Hurrire hâzihî’d-defter

Mustafa Şakir an Mehmed Adil el-müvellâ li-hilâfetihî be medîne-i Tosya nemmakahu’l-fakîr ileyhi izzetuhû

Ufiye anhu