Tosya'da Meryem Ana Rum Kilisesi'nin genişletilmesi için ruhsat verilmesi.

 KONU : Tosya’da bulunan Meryem Ana Rum Kilisesinin genişletilmesi için ruhsat verilmesi hakkında irade-i seniyye (75 hanede 25 Rum nüfus)

 

BELGE METNİ:

Şûrâ-yı Devlet

Dahiliye Dairesi

Aded

1081

 

Tosya kasabasında kâin Meryem Ana nâm Rum Kilisesi’nin tevsi‘ine ruhsat i‘tâsı hakkında Rum Patrikliğinden vuku bulan istida ve ol bâbda sebk iden isti‘lâma cevaben Kastamonu Vilayeti Meclisi İdaresinden vârid olan mazbata üzerine istîzânı hâvî Adliye ve Mezâhib Nezaretinin 29 Zilhicce 308 (5 Ağustos 1891) tarihli tezkiresiyle melfûfu Dîvân-ı Hümâyûn Kaleminden tanzim kılınan müzekkere ile beraber Şûrâ-yı Devlete havale buyurulmakla Dâhiliye Dairesinde kıraat olundu.

Mazbata-i mezkûre meâline nazaran kasaba-i mezkûrede Rum Cemaati yetmiş hanede iki yüz elli nüfus olup eski kilisenin temelleri üzerine havlısında tûlüne on buçuk ve arzına dört buçuk zirâ‘-ı mi‘mârî mahalli ilavesiyle kârgîr olarak müceddeden inşa ve masârıf-ı inşâiyesi olan üç yüz lira-yı Osmaninin mezkûr kilisenin nukûd-ı mevkûfesinden tesviye ve îfâ olunacağı ve halen bir gûne mahzuru olmadığı anlaşılmağla Dîvân-ı Hümâyûn Kalemi müzekkeresinde gösterildiği üzere bi’l-istîzân makrûn-ı müsâade-i seniyye-i hazret-i pâdişâhî buyrulduğu halde inşâat-ı mezkûre içün ruhsatı hâvî iktizâ iden emr-i âlînin kuyûd-ı lâzime ve mu‘tâde derciyle tasdîri hususunun Dîvân-ı Hümâyûn Kalemine ve mahalline teblîğât icrasına Dâhiliye Nezaretine havalesiyle Adliye ve Mezâhib Nezaretine de malumat i‘tâsı tezekkür ve haritası leffen takdim kılındı. Ol bâbda emir ve ferman hazret-i men lehu’l-emrindir.

Fi 4 Safer sene 309 ve fi 27 Ağustos sene 307 (9 Eylül 1891)

 

Şura-yı Devlet Dahiliye Dairesi Reisi ve azalar

 

Bâbıâlî

Dâire-i Sadâret

Âmedî-i Dîvân-ı Hümâyûn

 

Devletlü efendim hazretleri;

Kastamonu vilayeti dâhilinde Tosya kasabasında kâin Meryem Ana nâm Rum Kilisesinin tevsi‘ine ruhsat i‘tâsı Rum Patrikliğinden istida olunmuş olduğu ve kasaba-i mezkurede Rum Cemaati iki yüz elli nüfusdan ibaret olup eski kilisenin temelleri üzerine havlısından tûlüne on buçuk arzına dört buçuk zirâ‘-ı mi‘mârî mahallin ilavesiyle kârgîr olarak müceddeden inşa ve masarıfı olan üç yüz liranın kilisenin nukûd-ı mevkûfesinden îfâ olunacağı ve inşasında mevkian bir gûne mahzur olmadığı mahallinden iş‘âr edildiği beyanıyla suret-i istida karîn-i müsaade-i seniyye-i hazret-i padişahi buyrulduğu Dîvân-ı Hümâyûn Kalemi müzekkeresinde gösterildiği üzere kuyûd-ı lâzime ve mu‘tâdenin derciyle inşaat-ı mebhûsa içün ruhsatı hâvî emr-i âlî tasdîri ve muâmelât-ı müteferriasının icrası tezekkür kılındığına dair Şûrâ-yı Devlet Dâhiliye Dairesinden tanzim olunan mazbata leffen arz ve takdim olunmuş olmağla ol bâbda her ne veçhile irâde-i seniyye-i cenâb-ı mülûkâne müteallik buyrulur ise mantûk-ı âlîsi infâz edileceği beyanıyla tezkire-i senâverî terkîm kılındı efendim.

Fi 8 Rebiulevvel sene 309 ve fi 30 Eylül sene 307 (12 Ekim 1891)

Sadrazam

Cevad

 

Ma‘rûz-ı çâker-i kemîneleridir ki;

Resîde-i dest-i ta‘zîm olup melfuflarıyla manzûr-ı âlî buyrulan işbu tezkire-i sâmiye-i sadâret-penâhîleri üzerine mûcebince irâde-i seniyye-i cenâb-ı pâdişâhî şeref-müteallik buyrulmuş olmağla ol bâbda emir ve ferman hazret-i veliyyi’l-emrindir.

Fi 9 Rebiulevvel sene 309 ve fi 1 Teşrin-i Evvel sene 307 (13 Ekim 1891)

Serkâtib-i Hazret-i Şehriyârî

Süreyya