Tosya Sevinçviran Köyü Devres Kenarında Mera Davası.

 KONU : Tosya kazasına bağlı Sevinçviran köyü ahalisinin Delidevrez Nehri kenarında eskiden beri mera olarak kullandıkları yerin Mehmed ve oğlu Ali tarafından tarla yapılarak ziraat edilmesinin engellenmesi için Kengırı paşası ve Tosya kadısına hitaben ferman talebi.

 

BELGE :

Kanun üzere Divan’dan hüküm buyruldu.

Saadetlü Devletlü Meveddetlü Sultanım hazretleri sağ olsun

Bu kulları Tosya kazasına tabi Sevinçviran nam karye ahalileleri olup Delidevrez demekle maruf nehrin kenarında kadimü’l-eyyamdan berü malûmetü’l-hudûd zikr olunan karyemizin merası olup meranın ziraat ve hıraseti hilaf-ı kanun iken mukaddema müteveffa Mehmed ve ba‘dehû oğlu Ali nam kimsen mera-yı mezburu söküp tarlalar idüp ziraat ve hıraset idüp bundan akdem mezbur Ali ile murafaa-i şer‘ olduklarımızda husus-ı mezbura mukaddema ben gaib ani’l-meclis Sunullah ibn-i Ahmed Efendi nam kimesne ile murafaa oldum ve benim çiftliğim arazisindendir isbat idip bana hüküm birle hüccet verildi diye teaddi ve lakin mezburun iddia ve ahkam ve beyyinesinden mera davasında beyyine-i ûlâ olup kadimi mera olduğuna bu kulları isbat ve hüküm ve hüccet olunup ancak mezbur mündefi olmadığından tekrar mürafaa ve bir dahi ihzar ve ba‘dehu bir dahi hüccet olunmakla mezbur şerir ve mütegallibeden olmakla kendüsü Hüseyin ve Mehmed ve bazıları ile yekdil olup mera-yı mezburu ziraat ve hıraset edip gadr ve teaddi ederler yedlerimizde olan hücec-i şeriye ve fetva-yı şerife mucebince mezburların teaddi ve müdahaleleri men‘ ve meralık üzere kadime binaen bu kullarına zabt ve hali üzere ibkâ olunmak babında Kengırı paşasına ve Tosya kadısına hitaben hükm-i şerif reca olunup baki ferman saadetlü sultanımındır.

Bendegân-ı ahâlî-i karye-i mezbure

 

TOSYA YANGINI

 1913'te Tosya'nın 17 Mahallesinden 10'u Yanmış

KONU:

Tosya’da meydana gelen ve on yedi mahalleden onunun tamamen yandığı yangında evleri yanan mağdurların ev yapabilmeleri için bedelsiz olarak kereste kesmelerine izin verilmesi ile kireç ve kiremit vergisi alınmaması.

 

METİN:

Ticaret ve Ziraat Nezaret-i Celilesine

Tosya kasabasında zuhur eden harîkde kasabanın on yedi mahallesinden onu kâmilen muhterik olması cihetiyle mesken ve me’vâsız kaldıklarından bahisle emâkin-i muhterikanın tekrar inşasına medâr olmak üzere meccanen kereste kat‘ına müsaade i‘tâsı istid‘âsına dair kasaba-i mezkûre ahalisinden Sadık ve rüfekâsı imzalarıyla çekilen telgrafname Dahiliye Nezaret-i Celilesi’ne havale kılınmış idi. Bunlar tarafından nezarete aynı müracaatta bulunulduğu ve mevsim-i şitânın tekarrüb-i hulûlü hasebiyle açıkta kalan ahalinin mesâkin-i lâzimeyi bir gün evvel inşa edebilmeleri zımnında tervîc-i istid‘â münâsib görüldüğü nezâret-i müşârun ileyhâdan izbâr kılınmağla iktizasının îfâ ve inbâsı siyâkında

15 Zilkade sene 332 / 25 Eylül sene 330 (5 Ekim 1914)

 

Maliye Nezareti Vekaleti ve Ticaret ve Ziraat Nezaret-i Celilesi’ne

Tosya harîkzedegânının ebniye inşaatında istimal edilmek üzere Tosya kasabasına mücavir ormanlardan iki sene müddetle kat‘ ve imal edecekleri kereste bedeliyle kireç ve kiremit rüsumuna mukabil olmak üzere dört yüz otuz bin dokuz yüz yirmi guruşun Maliye Bütçesine fasl-ı mahsus olarak ilavesi zımnında muvakkaten mevki-i tatbike vaz olunan 30 Teşrin-i Sani 330 tarihli kanun-ı lazimesi bu kerre Meclis-i Umumice kabul olunarak ancak o babda heyet-i iane riyaset-i celilesinin vârid olan tezkireye melfûf şimdiye kadar bu gibi husûsâtta bütçeye ilave-i tahsisat tarafına gidilmeyerek muktezi kereste ve saire rüsumunun afvı tariki iltizam edilmekte bulunduğu ve hatta harekat-ı arziyeden dûçâr-ı hasar olan Isparta ve Burdur ahalisinin ihtiyacı maksadıyla tanzim ve mevki-i tatbike vaz‘ olunan kanun-ı muvakkatla ahali-i merkumenin mer’î ormanlarından kat‘ edeceği eşcârın bedelden ma‘fûviyeti cihetine gidildiği halde Tosya harikzedegânı için bütçeye ilave-i tahsisat cihetine gidilmesi etrafa (….) dâi olmağla bu cihet hükümetin nazar-ı dikkatine vaz edildiği beyan olmuş ve keyfiyet Ticaret ve Ziraat Nezaret-i Celilesine de işar kılınmışdır efendim.

25 Şaban [1]331(30 Temmuz 1913)